SN33.1

Saṁyutta Nikāya 33.1

1. Vacchagottavagga

Rūpaaññāṇasutta

Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.

Atha kho vacchagotto paribbājako yena bhagavā tenupasaṅkami; upasaṅkamitvā bhagavatā saddhiṁ sammodi.

Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho vacchagotto paribbājako bhagavantaṁ etadavoca:

“ko nu kho, bho gotama, hetu, ko paccayo, yānimāni anekavihitāni diṭṭhigatāni loke uppajjanti—

sassato lokoti vā, asassato lokoti vā, antavā lokoti vā, anantavā lokoti vā, taṁ jīvaṁ taṁ sarīranti vā, aññaṁ jīvaṁ aññaṁ sarīranti vā, hoti tathāgato paraṁ maraṇāti vā, na hoti tathāgato paraṁ maraṇāti vā, hoti ca na ca hoti tathāgato paraṁ maraṇāti vā, neva hoti na na hoti tathāgato paraṁ maraṇāti vā”ti?

“Rūpe kho, vaccha, aññāṇā, rūpasamudaye aññāṇā, rūpanirodhe aññāṇā, rūpanirodhagāminiyā paṭipadāya aññāṇā;

evamimāni anekavihitāni diṭṭhigatāni loke uppajjanti—

sassato lokoti vā …pe…

neva hoti na na hoti tathāgato paraṁ maraṇāti vāti.

Ayaṁ kho, vaccha, hetu, ayaṁ paccayo, yānimāni anekavihitāni diṭṭhigatāni loke uppajjanti—

sassato lokoti vā, asassato lokoti vā …pe…

neva hoti na na hoti tathāgato paraṁ maraṇāti vā”ti.

Paṭhamaṁ.

SN33.2

Saṁyutta Nikāya 33.2

1. Vacchagottavagga

Vedanāaññāṇasutta

Sāvatthinidānaṁ.

Ekamantaṁ nisinno kho vacchagotto paribbājako bhagavantaṁ etadavoca:

“ko nu kho, bho gotama, hetu, ko paccayo, yānimāni anekavihitāni diṭṭhigatāni loke uppajjanti—

sassato lokoti vā, asassato lokoti vā …pe…

neva hoti na na hoti tathāgato paraṁ maraṇāti vā”ti?

“Vedanāya kho, vaccha, aññāṇā, vedanāsamudaye aññāṇā, vedanānirodhe aññāṇā, vedanānirodhagāminiyā paṭipadāya aññāṇā;

evamimāni anekavihitāni diṭṭhigatāni loke uppajjanti—

sassato lokoti vā, asassato lokoti vā …pe…

neva hoti na na hoti tathāgato paraṁ maraṇāti vāti.

Ayaṁ kho, vaccha, hetu, ayaṁ paccayo, yānimāni anekavihitāni diṭṭhigatāni loke uppajjanti—

sassato lokoti vā, asassato lokoti vā …pe…

neva hoti na na hoti tathāgato paraṁ maraṇāti vā”ti.

Dutiyaṁ.

SN33.3

Saṁyutta Nikāya 33.3

1. Vacchagottavagga

Saññāaññāṇasutta

Sāvatthinidānaṁ.

Ekamantaṁ nisinno kho vacchagotto paribbājako bhagavantaṁ etadavoca:

“ko nu kho, bho gotama, hetu, ko paccayo, yānimāni anekavihitāni diṭṭhigatāni loke uppajjanti—

sassato lokoti vā, asassato lokoti vā …pe…

neva hoti na na hoti tathāgato paraṁ maraṇāti vā”ti?

“Saññāya kho, vaccha, aññāṇā, saññāsamudaye aññāṇā, saññānirodhe aññāṇā, saññānirodhagāminiyā paṭipadāya aññāṇā;

evamimāni anekavihitāni diṭṭhigatāni loke uppajjanti—

sassato lokoti vā, asassato lokoti vā …pe…

neva hoti na na hoti tathāgato paraṁ maraṇāti vāti.

Ayaṁ kho, vaccha, hetu, ayaṁ paccayo, yānimāni anekavihitāni diṭṭhigatāni loke uppajjanti—

sassato lokoti vā, asassato lokoti vā …pe…

neva hoti na na hoti tathāgato paraṁ maraṇāti vā”ti.

Tatiyaṁ.

SN33.4

Saṁyutta Nikāya 33.4

1. Vacchagottavagga

Saṅkhāraaññāṇasutta

Sāvatthinidānaṁ.

Ekamantaṁ nisinno kho vacchagotto paribbājako bhagavantaṁ etadavoca:

“ko nu kho, bho gotama, hetu, ko paccayo, yānimāni anekavihitāni diṭṭhigatāni loke uppajjanti—

sassato lokoti vā, asassato lokoti vā …pe…

neva hoti na na hoti tathāgato paraṁ maraṇāti vā”ti?

“Saṅkhāresu kho, vaccha, aññāṇā, saṅkhārasamudaye aññāṇā, saṅkhāranirodhe aññāṇā, saṅkhāranirodhagāminiyā paṭipadāya aññāṇā;

evamimāni anekavihitāni diṭṭhigatāni loke uppajjanti—

sassato lokoti vā, asassato lokoti vā …pe…

neva hoti na na hoti tathāgato paraṁ maraṇāti vāti.

Ayaṁ kho, vaccha, hetu, ayaṁ paccayo, yānimāni anekavihitāni diṭṭhigatāni loke uppajjanti—

sassato lokoti vā, asassato lokoti vā …pe…

neva hoti na na hoti tathāgato paraṁ maraṇāti vā”ti.

Catutthaṁ.

SN33.5

Saṁyutta Nikāya 33.5

1. Vacchagottavagga

Viññāṇaaññāṇasutta

Sāvatthinidānaṁ.

Ekamantaṁ nisinno kho vacchagotto paribbājako bhagavantaṁ etadavoca:

“ko nu kho, bho gotama, hetu, ko paccayo, yānimāni anekavihitāni diṭṭhigatāni loke uppajjanti—

sassato lokoti vā, asassato lokoti vā …pe…

neva hoti na na hoti tathāgato paraṁ maraṇāti vā”ti?

“Viññāṇe kho, vaccha, aññāṇā, viññāṇasamudaye aññāṇā, viññāṇanirodhe aññāṇā, viññāṇanirodhagāminiyā paṭipadāya aññāṇā;

evamimāni anekavihitāni diṭṭhigatāni loke uppajjanti—

sassato lokoti vā, asassato lokoti vā …pe…

neva hoti na na hoti tathāgato paraṁ maraṇāti vāti.

Ayaṁ kho, vaccha, hetu, ayaṁ paccayo, yānimāni anekavihitāni diṭṭhigatāni loke uppajjanti—

sassato lokoti vā, asassato lokoti vā …pe…

neva hoti na na hoti tathāgato paraṁ maraṇāti vā”ti.

Pañcamaṁ.

SN33.6-10

Saṁyutta Nikāya 33.6–10

1. Vacchagottavagga

Rūpaadassanādisuttapañcaka

Sāvatthinidānaṁ.

Ekamantaṁ nisinno kho vacchagotto paribbājako bhagavantaṁ etadavoca:

“ko nu kho, bho gotama, hetu, ko paccayo, yānimāni anekavihitāni diṭṭhigatāni loke uppajjanti—

sassato lokoti vā, asassato lokoti vā …pe…

neva hoti na na hoti tathāgato paraṁ maraṇāti vā”ti?

“Rūpe kho, vaccha, adassanā …pe…

rūpanirodhagāminiyā paṭipadāya adassanā …pe…

vedanāya …

saññāya …

saṅkhāresu kho, vaccha, adassanā …pe…

viññāṇe kho, vaccha, adassanā …pe… viññāṇanirodhagāminiyā paṭipadāya adassanā …pe….

Dasamaṁ.

SN33.11-15

Saṁyutta Nikāya 33.11–15

1. Vacchagottavagga

Rūpaanabhisamayādisuttapañcaka

Sāvatthinidānaṁ.

“Rūpe kho, vaccha, anabhisamayā …pe… rūpanirodhagāminiyā paṭipadāya anabhisamayā …pe….

Sāvatthinidānaṁ.

“Vedanāya kho, vaccha, anabhisamayā …pe….

Sāvatthinidānaṁ.

“Saññāya kho, vaccha, anabhisamayā …pe….

Sāvatthinidānaṁ.

“Saṅkhāresu kho, vaccha, anabhisamayā …pe….

Sāvatthinidānaṁ.

“Viññāṇe kho, vaccha, anabhisamayā …pe….

Pannarasamaṁ.

SN33.16-20

Saṁyutta Nikāya 33.16–20

1. Vacchagottavagga

Rūpaananubodhādisuttapañcaka

Sāvatthinidānaṁ.

Ekamantaṁ nisinno kho vacchagotto paribbājako bhagavantaṁ etadavoca—

ko nu kho, bho gotama, hetu, ko paccayo …pe…

rūpe kho, vaccha, ananubodhā …pe… “rūpanirodhagāminiyā paṭipadāya ananubodhā …pe….

Sāvatthinidānaṁ.

“Vedanāya kho, vaccha …pe….

Sāvatthinidānaṁ.

“Saññāya kho, vaccha …pe….

Sāvatthinidānaṁ.

“Saṅkhāresu kho, vaccha …pe….

Sāvatthinidānaṁ.

“Viññāṇe kho, vaccha, ananubodhā …pe…

viññāṇanirodhagāminiyā paṭipadāya ananubodhā …pe…

vīsatimaṁ.

SN33.21-25

Saṁyutta Nikāya 33.21–25

1. Vacchagottavagga

Rūpaappaṭivedhādisuttapañcaka

Sāvatthinidānaṁ. Ko nu kho, bho gotama, hetu, ko paccayo …pe….

“Rūpe kho, vaccha, appaṭivedhā …pe… viññāṇe kho, vaccha, appaṭivedhā …pe….

Pañcavīsatimaṁ.

SN33.26-30

Saṁyutta Nikāya 33.26–30

1. Vacchagottavagga

Rūpaasallakkhaṇādisuttapañcaka

Sāvatthinidānaṁ.

“Rūpe kho, vaccha, asallakkhaṇā …pe… viññāṇe kho, vaccha, asallakkhaṇā …pe….

Tiṁsatimaṁ.

SN33.31-35

Saṁyutta Nikāya 33.31–35

1. Vacchagottavagga

Rūpaanupalakkhaṇādisuttapañcaka

Sāvatthinidānaṁ.

“Rūpe kho, vaccha, anupalakkhaṇā …pe… viññāṇe kho, vaccha, anupalakkhaṇā …pe….

Pañcatiṁsatimaṁ.

SN33.36-40

Saṁyutta Nikāya 33.36–40

1. Vacchagottavagga

Rūpaappaccupalakkhaṇādisuttapañcaka

Sāvatthinidānaṁ.

“Rūpe kho, vaccha, appaccupalakkhaṇā …pe… viññāṇe kho, vaccha, appaccupalakkhaṇā …pe….

Cattālīsamaṁ.

SN33.41-45

Saṁyutta Nikāya 33.41–45

1. Vacchagottavagga

Rūpaasamapekkhaṇādisuttapañcaka

Sāvatthinidānaṁ.

“Rūpe kho, vaccha, asamapekkhaṇā …pe… viññāṇe kho, vaccha, asamapekkhaṇā …pe….

Pañcacattālīsamaṁ.

SN33.46-50

Saṁyutta Nikāya 33.46–50

1. Vacchagottavagga

Rūpaappaccupekkhaṇādisuttapañcaka

Sāvatthinidānaṁ.

“Rūpe kho, vaccha, appaccupekkhaṇā …pe… viññāṇe kho, vaccha, appaccupekkhaṇā …pe….

Paññāsamaṁ.

SN33.51-54

Saṁyutta Nikāya 33.51–54

1. Vacchagottavagga

Rūpaappaccakkhakammādisuttacatukka

Sāvatthinidānaṁ.

Atha kho vacchagotto paribbājako yena bhagavā tenupasaṅkami; upasaṅkamitvā bhagavatā saddhiṁ sammodi.

Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho vacchagotto paribbājako bhagavantaṁ etadavoca:

“ko nu kho, bho gotama, hetu, ko paccayo, yānimāni anekavihitāni diṭṭhigatāni loke uppajjanti—

sassato lokoti vā …pe…

neva hoti na na hoti tathāgato paraṁ maraṇāti vā”ti?

“Rūpe kho, vaccha, appaccakkhakammā, rūpasamudaye appaccakkhakammā, rūpanirodhe appaccakkhakammā, rūpanirodhagāminiyā paṭipadāya appaccakkhakammā …pe….

Sāvatthinidānaṁ.

“Vedanāya kho, vaccha, appaccakkhakammā …pe… vedanānirodhagāminiyā paṭipadāya appaccakkhakammā …pe….

Sāvatthinidānaṁ.

“Saññāya kho, vaccha, appaccakkhakammā …pe… saññānirodhagāminiyā paṭipadāya appaccakkhakammā …pe….

Sāvatthinidānaṁ.

“Saṅkhāresu kho, vaccha, appaccakkhakammā …pe… saṅkhāranirodhagāminiyā paṭipadāya appaccakkhakammā …pe….

Catupaññāsamaṁ.

SN33.55

Saṁyutta Nikāya 33.55

1. Vacchagottavagga

Viññāṇaappaccakkhakammasutta

Sāvatthinidānaṁ.

“Viññāṇe kho, vaccha, appaccakkhakammā, viññāṇasamudaye appaccakkhakammā, viññāṇanirodhe appaccakkhakammā, viññāṇanirodhagāminiyā paṭipadāya appaccakkhakammā;

evamimāni anekavihitāni diṭṭhigatāni loke uppajjanti—

sassato lokoti vā, asassato lokoti vā …pe…

neva hoti na na hoti tathāgato paraṁ maraṇāti vāti.

Ayaṁ kho, vaccha, hetu, ayaṁ paccayo, yānimāni anekavihitāni diṭṭhigatāni loke uppajjanti—

sassato lokoti vā, asassato lokoti vā, antavā lokoti vā, anantavā lokoti vā, taṁ jīvaṁ taṁ sarīranti vā, aññaṁ jīvaṁ aññaṁ sarīranti vā, hoti tathāgato paraṁ maraṇāti vā, na hoti tathāgato paraṁ maraṇāti vā, hoti ca na ca hoti tathāgato paraṁ maraṇāti vā, neva hoti na na hoti tathāgato paraṁ maraṇāti vā”ti.

Pañcapaññāsamaṁ.

Vacchagottavaggo paṭhamo.

Tassuddānaṁ

Aññāṇā adassanā ceva,

Anabhisamayā ananubodhā;

Appaṭivedhā asallakkhaṇā,

Anupalakkhaṇena appaccupalakkhaṇā;

Asamapekkhaṇā appaccupekkhaṇā,

Appaccakkhakammanti.

Vacchagottasaṁyuttaṁ samattaṁ.