Sāvatthinidānaṁ. Ekamantaṁ ṭhitā kho sā devatā bhagavantaṁ gāthāya ajjhabhāsi:

“Araññe viharantānaṁ, santānaṁ brahmacārinaṁ; Ekabhattaṁ bhuñjamānānaṁ, kena vaṇṇo pasīdatī”ti.

“Atītaṁ nānusocanti, nappajappanti nāgataṁ; Paccuppannena yāpenti, tena vaṇṇo pasīdati.

Anāgatappajappāya, atītassānusocanā; Etena bālā sussanti, naḷova harito luto”ti. Naḷavaggo paṭhamo.

Tassuddānaṁ Oghaṁ nimokkhaṁ upaneyyaṁ, Accenti katichindi ca; Jāgaraṁ appaṭividitā, Susammuṭṭhā mānakāminā; Araññe dasamo vutto, Vaggo tena pavuccati.